Sumarbúðir á Úlfljótsvatni

Efnisflokkur: 
Sumarbúðir, Útivist
Tímabil: 
júní, júlí, ágúst
Aldur: 
9 ára, 10 ára, 11 ára, 12 ára, 13 ára, 14 ára

Það er líf og fjör að mæta í sumarbúðir og kynnast nýjum krökkum, náttúrunni og fara í spennandi dagskrá. Dæmi um dagskrá í sumarbúðunum er klifur, vatnasafarí,  þrautabraut, bátar, bogfimi, leikir, þrautir, kvöldvökur og ýmislegt fleira. 
Sumarið 2021 verður boðið upp á fjögur tímabil. Sumarbúðirnar eru ætlaðar börnum á aldrinum 9 - 14 ára, fædd 2012 - 2007. 

Tímabil:

14.-18. júní fyrir 9-12 ára (örfá sæti laus)

21.-25. júní fyrir 9-12 ára (örfá sæti laus)

28-2. júlí fyrir 9-12 ára (örfá sæti laus)

9. - 13. ágúst fyrir 11-14 ára

Aðstaða til útivistar gerist vart betri, fjöldi leiktækja og þrautabrauta, stærsti klifur- og sigturn landsins og margar skemmtilegar gönguleiðir. Starfsmennirnir eru stoltir af því að bjóða upp á metnaðarfulla dagskrá sem nær vel til krakka. Í sumarbúðunum eru allir þátttakendur og takast á við spennandi viðfangsefni í náttúrulegu og öruggu umhverfi. 

Öll aðstaða er eins og best verður á kosið. Þátttakendur gista í 4-8 manna herbergjum í JB-skála og DSÚ-skála á aðalsvæði Útilífsmiðstöðvarinnar. Öll herbergi eru með kojum. Þátttakendum verður raðað saman í herbergi þegar komið er á svæðið og geta vinir óskað eftir því að vera saman í herbergi. 

Sumarbúðir skáta á Úlfljótsvatni eru fyrir alla káta krakka á aldrinum 9- 14 ára. Sumarbúðirnar eru reknar af skátahreyfingunni og eru gildi hennar höfð til hliðsjónar í öllu starfi. Sumarbúðirnar hafa verið starfræktar að Úlfljótsvatni síðan 1941. Framan af var aðeins um að ræða sumarbúðir fyrir skáta, og sváfu þeir fyrstu árin í tjöldum. Útilífsmiðstöð skáta Úlfljótsvatni er í Grafningi, skammt frá Ljósafossvirkjun. Jörðin er í eigu skáta og Skógræktarfélags Íslands. Útilífsmiðstöðin hefur um áratuga skeið verið aðalbækistöð skáta á Íslandi. Þar er miðstöð foringjaþjálfunnar skáta, aðstaða fyrir skátamót, skólabúðir, sumarbúðir og tjaldsvæði fyrir almenning.

Skráning fer fram hér. Frekari upplýsingar má finna hér

Síðast uppfært: 
Miðvikudagur, 16. júní 2021 - 16:11